Ir ao contido
Gastos de envío dende 1,95€! 📦
Gastos de envío dende 1,95€! 📦
VELLOUCAS & MINCHAS

VELLOUCAS & MINCHAS

por Lorena Conde
€15,50
ISBN 9788412160451
III Premio María Victoria Moreno de Literatura Xuvenil. Despois do “suceso”, a Sofía non lle queda outra que ir pasar parte do verán ao piso da súa avoa Rosa en Veigamoa, onde parece que nunca acontece nada. Unha vez alí, a rapaza decátase de que o ambiente na vila está enrarecido, de que a xente escapa da súa avoa e das súas amigas cando van pola rúa, de que reciben chamadas telefónicas no medio da noite e de que sofren actos vandálicos no edificio. Coa mosca detrás da orella, Sofía decide pescudar. Non lle gusta nada o que descobre, se hai algo que non pode soportar, son as inxustizas. Coa axuda da súa mellor amiga Gabri e as boas persoas da vila, trata de resolver o sarillo no que está metida a avoa Rosa e mais as súas amigas e veciñas Gloria e Lita. Conseguirano?  

Lorena Conde
(Pontesampaio, 1980)
Licenciada en Filoloxía Hispánica e especialista universitaria en Arte Dramática pola USC. Ténica superior de Artes Plásticas e Deseño en Artes Aplicadas da Escultura pola EASD Mestre Mateo.
Durante anos leva obradoiros escénicos de diversos centros educativos. De 2008 a 2015 dirixe Enlata Teatro, compañía universitaria impulsada pola Facultade de Ciencias da Educación da USC. En 2013 cofunda Matrioshka Teatro, compañía na que actúa, realiza o deseño gráfico e de escenografía e tamén escribe. En 2013 e 2014 coordina o Proxecto de creación escénica AD HOC en colaboración coa Facultade de Ciencias da Educación da USC e a Rede de Centros Socioculturais do Concello de Santiago.
Dende 2014 forma parte de Farrapo Teatro, compañía para a que escribe e dirixe Frío, peza coa que gaña en 2016 os premios á mellor deseño de vestiario, mellor dirección e mellor espectáculo no X Festival Internacional de Teatro Cale-Se en Vila Nova de Gaia, Portugal.En 2017 participa na fundación da compañía A Feroz que en 2018 se estrea co seu primeiro proxecto,AFTERPARTY. Dende 2009 desenvolve un labor de experimentación nas artes aplicadas no seu propio taller, A Maranha, no que se vai decantando pola investigación en materiais infrecuentes para xoiería, decoración e realización de obxectos para a escena. En 2016 gaña o XVIII Premio de poesía Miguel González Garcés con Entullo, o seu primeiro poemario.En 2020 faise co XXXVI Premio de poesía Cidade de Ourense co poemario As puntas da louza. Cancioneiro de labor.

____

Editorial: Cuarto de inverno
Idioma: Galego
Colección: XUVENIL