Trátase do catálogo da exposición que perdurará no tempo.
O Museo das Peregrinacións e de Santiago abre as súas salas para acoller a obra do célebre artista Alfonso Sucasas. A sinerxía producida entre a visión da arte contemporánea e o fenómeno xacobeo alcanzan a súa máxima expresión da man do pintor lalinense.
«Sucasas. Camiño e Mitoloxía» está composta por unha coidada selección de 56 pezas que mostran a implicación do artista coa historia xacobea e o Camiño de Santiago. As obras expostas proceden principalmente do préstamo de S.A. de Xestión do Plan Xacobeo, completando a serie con aportacións de coleccións particulares, da viuda do artista, do Parlamento de Galicia e da Casa de Galicia de Madrid.
A exposición conta co selo de calidade, da especialista en arte contemporáneo, Pilar Corredoira, comisaria da mostra.
SUCASAS. CAMIÑO E MITOLOXÍA
As pinturas, debuxos e bosquexos dos que podemos gozar nesta exposición corresponden fundamentalmente a etapa produtiva que desenvolve o artista entre 1992 e 1993, onde o Camiño de Santiago e a mitoloxía relixiosa supuxeron unha fonte de reflexión para o pintor Alfonso Sucasas.
A serie sitúa, nun mesmo plano, lendas e crónicas que se refiren ao ben, ao mal, a milagres e pasaxes relativos á alma humana, ao sobrenatural. O artista rescata figuras simbólicas e as coloca nun contexto contemporáneo, dotándoas dunha iconografía propia, á vez que as incorpora ao seu universo creativo.
A comarca do Deza convértese no escenario da súa obra, é o paraíso que lle dá cobertura habitual aos seus característicos personaxes creados a base de trazos fortes e concisos. O protagonismo da paisaxe podería responder ás súas preocupacións arredor da conservación do Camiño e a súa dignificación como espazo natural.
Para a elaboración desta serie, o artista realiza un profundo traballo de investigación e estudo das imaxes que ilustran o camiño milenario en libros e códices. Como fixera anos antes, dirixiuse ás fontes históricas da pintura, á súa relación cos textos sacros. Revisou unha vez máis a obra de Masaccio, El Greco, Murillo ou Rafael Sanzio, quen, xunto a outros artistas máis próximos no tempo, contribuíron a asentar o seu propio estilo.
Sucasas, neste aspecto, canaliza os grandes asuntos da mitoloxía cristiá no ámbito da Ruta Xacobea, engadindo outros argumentos que se verán reflectidos nas pinturas creadas e referidas a momentos cotiáns das xentes que peregrinan a Compostela.
Ten unha relevancia especial para esta institución a serie de pinturas que se poderían denominar de tradición compostelá. Recordan os vínculos de Sucasas coa cidade na que viviu. O pintor penetra nos seus segredos e capta a riqueza do seu patrimonio arquitectónico e escultórico, os costumes das xentes, o ambiente das rúas e o reflicte nas súas obras.
ALFONSO SUCASAS (1940 - 2012)
Alfonso Sucasas (San Miguel de Goiás, Lalín, 1940 - Vila de Cruces, Ferreirós, 2012) iníciase como pintor na década dos anos cincuenta en Lalín baixo a aprendizaxe do profesor Carloandré López del Río. En Madrid continúa a súa formación á beira de Manuel Gutiérrez Navas.
En 1958 comeza o súa etapa americana en Venezuela e posteriormente en Río de Xaneiro e São Paulo. Nos seus destinos conecta cos círculos artísticos de vangarda do momento. Alterna a creación da súa obra pictórica co deseño para empresas de publicidade e leva a cabo escenografías para o teatro
En 1968 regresa a Galicia convencido da súa pertenza á cultura europea e cunha linguaxe asentada. Nesta nova etapa incorpora temas relacionados coas xentes populares e a paisaxe da súa terra. O seu propio estilo aporta unha innegable renovación ao panorama plástico peninsular naqueles primeiros anos da década dos setenta.
A partir dos anos noventa prodúcese unha renovación na súa obra. Promove a desenvoltura das figuras, nos definidos perfís e rostros ás veces sobrepostos e na conformación das siluetas. As cores acentúanse e corroboran o poder de comunicación dunha pintura que adquire un maior dinamismo e movemento. Por esas datas aborda a paisaxe dende unha consideración diferente.
PILAR CORREDOIRA
Pilar Corredoira, comisaria desta nova exposición do Museo das Peregrinacións e de Santiago, é unha das maiores especialistas en arte contemporáneo. A súa longa traxectoria e experiencia no comisariado de exposicións avala a calidade do seu traballo. De toda esa actividade queda constancia nos numerosos libros e catálogos publicados.
Na actualidade forma parte da Xunta Directiva da Asociación Vía Circulo Jefferson, do Instituto de Arte Contemporánea e colabora, semanalmente, como columnista de arte no diario compostelán El Correo Gallego.
____
Editorial: XUNTA DE GALICIA 07-2023Idioma: Galego