TERRAS DE VILARIÑO DE CONSO

Na presente monografía, os autores deixan constancia do legado histórico e cultural que o paso do tempo foi deixando nas terras de Vilariño de Conso. Neste traballo faise un percorrido polos aspectos que teñen que ver coas tradicións, cos costumes e cos xeitos locais de vida. A obra combina datos históricos, arqueolóxicos e etnográficos, achegándonos ao devir histórico deste concello ourensán, ás súas festividades tradicionais, aos ciclos rituais anuais, á economía local e á tradición oral. Nestas páxinas o lector convivirá co lobo da xente, co mito da moura, con labras heráldicas e con cantares de reis, lendas e romances, entre outras expresións do patrimonio material e inmaterial. Tamén coas xentes do lugar, que xeración tras xeración trouxeron ata nós, e seguen mantendo vivo, o maior dos valores que pode ter unha comunidade, que non é outro que a identidade propia e o sentimento de pertenza. Unha viaxe didáctica que vai parando en cada unha das aldeas, nas que se recolleron as historias, as tradicións e os relatos que nos axudan a entender o alto valor etnográfico e patrimonial co que conta este concello que durme baixo o abrigo do Invernadeiro.