Este studo quier ser un retrato atual de la bitalidade de la lhéngua mirandesa, de ls usos, trejeitos lhenguísticos i l saber de ls habitantes de la Tierra de Miranda. La “Brigada de la Lhéngua” benida de la Ounibersidade de Bigo fizo an 2020, 315 anquéritos pessonales an todas las franjas d'eidade i freguesias de Miranda que dórun al redor de 25 000 (binte cinco mil) respuostas. De la análeze i anterpretaçon destes dados podemos dezir que la lhéngua mirandesa stá nua situaçon mui andeble por bias de l abaldono de las outeridades políticas, admenistratibas, eiducatibas i académicas pertuesas. Se Pertual nun se mexir antes de 2030 i nun aplicar cun alma ua pedagogie social, ourçamentos i legislaçon zeladoras, l mirandés dará l último spatalejar de la muorte antes de la metade deste séclo. Cul grande potencial cultural i eiquenómico que puode tener, resguardar i apalancar este patrimonho mundial único pa las geraçones feturas i para toda la houmanidade ye solo ua queston de gana, la de aplicar de maneira planeficada ua política lhenguística séria i capaç pal ambibecer de la outra lhéngua de Pertual.
____
Editorial: UVIGO 02-2023
Idioma: Mirandes