VERBO DA TEORÍA DA RELATIVIDADE RESTRINXIDA E XERAL

A teoría da relatividade restrinxida e xeral supón un dos cumios da capacidade intelectual do ser humano. Reformulou os conceptos de espazo e tempo, a comprensión da orixe e evolución do Universo, e propiciou a entrada na era nuclear. Para os historiadores de dentro duns séculos esta fazaña do xenial físico Albert Einstein será un dos fitos do século XX. Hai multitude de libros divulgativos sobre ela, pero este ten o decisivo valor de ser escrito polo mesmo Einstein en 1916, ano seguinte ao de presentación da relatividade xeral. O esforzo do autor por chegar a un público amplo queda patente na linguaxe e didáctica empregadas, pensadas para achegarse á persoa que pasa as páxinas e evitar complexidades matemáticas. Estrutúrase en dúas metades, unha para a relatividade restrinxida e outra para a xeral. Grazas ao Consello da Cultura Galega, unha obra desta magnitude ve agora a luz en galego, incorporando dúas pezas introdutorias e a versión facsimilar. Tradúcese a primeira das edicións, que foi publicada en 1917, antes da espectacular observación en 1919 da curvatura da luz por efectos gravitatorios, o que supuxo a primeira confirmación das predicións da relatividade xeral e catapultou a Einstein a unha popularidade global.