A mostra "BDG70: a revolta do cómic galego" nace como resultado da investigación realizada en 2015 por Xulio Carballo para a súa tese doctoral sobre o cómic galego.
Esta exposición quere poñer de relevo a gran cantidade de artistas que, aínda en período ditatorial, canalizaron o seu pensamento antiautoritario e artístico a través dun medio aínda marginal, o cómic, e dunha lingua pretendidamente marginalizada, o galego.
A riqueza e variedade temática, das técnicas artísticas e dos diferentes formatos empregados non deixarán indiferente ao visitante, que con seguridade vai poder mergullarse na historia política e social dos anos setenta por medio da novena arte.
A exposición ten unha clara vocación tanto estética como didáctica e divulgativa, ao combinar o espertar creativo a respecto do cómic de diversos colectivos e autores e que marcarían un punto de inflexión na concepción artística do momento, cunha profunda carga social, reivindicativa e cultural que nos achegará unha clarificadora visión do tardofranquismo e da transición, así como da necesidade de xustiza social que lestes novos creadores demandaban.
A mostra ten como obxectivo recoller e presentar ao público as obras e documentos máis importantes e característicos do nacemento contemporáneo do cómic galego, que tería precisamente unha das súas primeiras manifestacines en NORMAL fai 43 anos, a través da cal conxugouse a denuncia social por medio dunha linguaxe nova, dun carácter transgresor e onde terían moita importancia as representacións dunha Galicia distópica enmarcada dentro da ficción científica, así como o seu achegamento aos medios de comunicación como periódicos ou revistas.
27 AUTORES: Alberte Permuy / Antón Patiño / Fran Jaraba / Gonzalo Navaza / Isaac Díaz Pardo / J. María Méndez / Luís Esperante / Miguel Docampo / Miguelanxo Prado / Oitabén / Paco Martín / Pepe Varro / Pepe Carreiro / Raimundo Patiño / Ricardo Lázaro / Rosendo Díaz Roxo / Saavedra Pita / Ulises L. Sarry / Xan Balboa / Xan López Domínguez / Xan Navarro / Xaquín Marín / Xesús Chichi Campos / Xiráldez / Xosé Díaz / Xosé Lois Carrabouxo/ Vicente Veiga
8 MÓDULOS:
1. ORIXES
2. VANGUARDIA
3. CIENCIA FICCIÓN
4. ESPAZOS EXPOSITIVO
5. ESCOLA
6. PRENSA
7. REVISTAS
8. COLECTIVOS
____
Editorial: Unicersidade da Coruña
Idioma: Galego