Un conxunto de historias sobre os seres humanos e os seus xogos, paixóns, impulsos e traxedias, opresións e desexos incontibles de liberación. Sobre os seus fracasos, as súas derrotas e as vitorias da existencia.
Unha parella que se perde no medio da fraga e se reencontra, un eterno retorno entre a paixón erótica e o abismo, a vida que constrúe o desexo ou o desexo que organiza a vida, o azar e a súa tráxica e caprichosa vontade, as lóxicas do dominio e o control, da rebelión e a sabotaxe, o desafío material da realidade e as opresións do traballo, as normas do éxito e do fracaso, a loucura irrefreable do poder coas súas dinámicas absurdas e inaccesibles, e a ousadía de concibir a posibilidade de desconectalo... Estes contos narrados desde o interior da boca do lagarto, o mesmo lugar en que o tigre amosa os dentes afiados coma navallas, observan a realidade desde diferentes perspectivas, desde dentro e desde fóra, desde as teas da aparencia e desde o núcleo descarnado da rede que nos conecta e nos vixía asemade. Entre a complexidade do material e a simpleza dos signos dun código binario. Os personaxes son carne e alento e ao mesmo tempo impulsos electromagnéticos nun metaverso caprichoso e sen regras fixas. Talvez iso somos os humanos. «O tigre na boca do lagarto» é un conxunto de historias sobre os seres humanos e os seus xogos, paixóns, impulsos e traxedias, opresións e desexos incontibles de liberación. Sobre os seus fracasos, as súas derrotas e as vitorias da existencia.
Antón Dobao (Lugo, 1963), licenciado en Filoloxía Galega, e asesor lingüista da TVG, medio para o que tamén exerce como Director e Guionista de ficción audiovisual. É membro do comité de redacción das revistas «A Trabe de Ouro» e «Cadernos da Lingua», e forma parte do colectivo Redes Escarlata. Traduciu ao galego obras de George Orwell, Antoni Mari, J.D. Salinger, Carles Bellsoà e Paul Auster. Como poeta publicou Desde o teito da noite (Xerais 1987), Caderno dos dereitos e das horas (accésit do Premio Miguel González Garcés, 1994), O tempo entre murallas (Xerais 1997), Contraantoloxía de textos exiliados (2002), Materia (Xerais 2005) e Onde o ollar comeza a doer (2007). Publicou os libros de relatos «Incertos» (Xerais, 2008) e «O tigre na boca do lagarto» (Xerais, 2024). Como director cinematográfico dirixiu Os outros feirantes (1998), Un mundo de historias (2000), A biblioteca da iguana (2005), Pataghorobí (2005), O Bosque de Levas (2006) e A Mariñeira (2007).
____
Editorial: Xerais 04-2024
Idioma: Galego