Repostas á enquisa do Ateneo de Madrid, (1901-1902)
A principios do século XX a metodoloxía de recollida de datos máis utilizada en estudos antropolóxicos foi a técnica de enquisas, cunha batería de preguntas enviadas a persoas que actuaban como intermediarias entre a sociedade tradicional e a persoa investigadora. Unha destas iniciativas apareceu en 1901 baixo o título Información promovida por la Sección de Ciencias Morales y Políticas del Ateneo de Madrid en el campo de las costumbres populares y en los tres hechos más característicos de la vida: el nacimiento, el matrimonio y la muerte, da que eran autores R. Salillas, J. Puyol, C. Bernaldo de Quirós, E. García Herreros, G. Pedregal e R. Camarón.
O Consello da Cultura Galega presenta nesta obra os datos referidos a Galicia recollidos nese cuestionario e que chegaron aos nosos días. Este non pretende ser un estudo exhaustivo da enquisa, senón un documento divulgativo para que sirva de fonte de información, en galego, en futuras investigacións sobre a nosa cultura popular.