Apostando polos produtos locais e frescos, Miguel Burros, cociñeiro e propietario do sonado restaurante O Cabaliño do Demo, en Santiago de Compostela, escribiu un libro baseado na súa reputada experiencia gastronómica, persoal e familiar.En Cociña vexetariana reprodúcense numerosas receitas para primeiros pratos, segundos pratos, salsas, masas e sobremesas. Todo un mostrario de posibilidades que van desde as ensaladas (de pementos asados, grega, de xudías e tomate, de peras e mandarinas, de arroz…), os tomates verdes fritidos, as croquetas de millo, a empanada vexetal ou os aliños, aos guisos de delicias de cogumelos, o pastel de bulgur, as lentellas, o guisado de fabas, a lasaña, o enfornado de espinacas, a coliflor con espaguetes, gumbo de hortalizas, Yemsir W’et, Mole, Ratatui, ás salsas de tomate, curri, tain, crema inglesa, bechamel… e, por suposto, ás tortas de chocolate, améndoas e café, o flan de queixo, a crema de limón, biscoitiños de morangos, tiramisú ao xeito Xoán, torta de noces, torta de leite callado e froita…